مالیگاؤں میں پچھلے ڈیڑھ سال سے جنم داخلہ کا مسئلہ عوام کے لئے بڑی پریشانی بنا ہوا ہے۔ کئی افراد کے داخلے رد ہوگئے ہیں اور متعدد خاندانوں کو اپنے بچوں کے اسکول میں داخلہ کے لئے سخت مشکلات کا سامنا کرنا پڑ رہا ہے۔ مائناریٹی ڈیفنس کمیٹی مسلسل اس معاملہ پر عوام کی نمائندگی کر رہی ہے اور مختلف سطح پر حکام سے رابطے میں ہے۔ مالیگاؤں کارپوریشن میں مالیگاؤں سیکولر فرنٹ کو اقتدار ملنے کے بعد 18 فروری کو منعقدہ پہلی مہاسبھا میں جنم داخلہ سے متعلق مستقیم ڈگنیٹی کی پیش کردہ تجویز منظور کی گئی، جس کے بعد اس مسئلہ کو مزید سنجیدگی کے ساتھ آگے بڑھایا گیا اور اسی سلسلے میں ضلع کلکٹر نے یہ میٹنگ طلب کی۔
مائناریٹی ڈیفنس کمیٹی کی جانب سے یہ اہم مشورہ پیش کیا گیا کہ کیمپ کے پہلے مرحلے میں ایسے بچوں کو ترجیح دی جائے جو اسکول میں زیر تعلیم ہیں یا جن کی عمر اسکول میں داخلہ کی ہوچکی ہے لیکن برتھ سرٹیفکیٹ نہ ہونے کی وجہ سے انہیں ایڈمیشن میں رکاوٹ پیش آرہی ہے۔ ضلع کلکٹر نے اس تجویز کو سنجیدگی سے قبول کرتے ہوئے یقین دہانی کرائی کہ پہلے مرحلے میں اسکولی بچوں اور انتہائی ضرورت مند خاندانوں کے داخلے بنائے جائیں گے، جبکہ بعد کے مرحلے میں دیگر افراد کے جنم داخلے بنائے جائیں گے۔
میٹنگ کے بعد آصف شیخ رشید نے اخباری نمائندوں سے گفتگو کرتے ہوئے کہا کہ ضلع انتظامیہ کے تعاون سے بہت جلد کیمپ کی تاریخ کا باضابطہ اعلان کیا جائے گا۔ انہوں نے بتایا کہ SIT کے بعد رد کئے گئے جنم داخلوں کو دوبارہ قانونی طریقے سے بحال یا نئے سرے سے بنانے کے لئے بھرپور کوشش جاری ہے۔ شیخ آصف اور مستقیم ڈگنیٹی نے عوام سے اپیل کی کہ وہ گھبرائیں نہیں28 فروری بروز سنیچر سے روزانہ تراویح کے بعد شیخ رشید بھون آگرہ روڈ اور سماجوادی پارٹی عوامی رابطہ آفس آگرہ روڈ پر مائناریٹی ڈیفنس کمیٹی کے ذمہ داران عوام کی رہنمائی کے لئے موجود رہیں گے۔ یہاں جنم داخلہ نیا بنانے کے لئے عرضی دینے کا طریقہ، درکار کاغذات، قانونی تقاضے اور کیمپ میں شرکت کے مراحل کے بارے میں مکمل معلومات فراہم کی جائیں گی تاکہ عوام کو کسی بھی قسم کی دشواری کا سامنا نہ کرنا پڑے۔
ناسک سے مائناریٹی ڈیفنس کمیٹی کے کوآرڈینیٹر مستقیم ڈگنیٹی نے بتایا کہ یہ پیش رفت مالیگاؤں کے ہزاروں خاندانوں کے لئے راحت کا سبب بنے گی اور خاص طور پر وہ بچے جو صرف جنم داخلہ کی کمی کی وجہ سے تعلیم سے محروم ہو رہے ہیں، اب انہیں انصاف اور سہولت ملنے کی امید پیدا ہوگئی ہے۔ انہوں نے کہا کہ کمیٹی آئندہ بھی عوامی مسائل کے حل کے لئے سنجیدہ اور مستقل کوشش جاری رکھے گی۔
