سری لنکا : 11 مئی / سری لنکا میں حالات دن بہ دن خراب ہوتے جارہے ہے ، کل ملک کی وزارت دفاع نے تینوں فوجوں کو حکم جاری کرتے ہوئے کہا کہ اب کوئی بھی مظاہرہ کرتا ہوا دکھائی دیا تو اسے گولی مار دی جائے ۔ اس سے قبل ملک کے صدر گوٹ بایا راج پکسے نے لوگوں سے تشدد اور مظاہرے نہ کرنے کی اپیل کی تھی۔
سری لنکا میں حالات دن بدن خراب ہوتے جارہے ہیں، ایسے میں حکومت نے بڑا فیصلہ کیا ہے ۔
وہیں اپوزیشن نے سری لنکا کے صدر گوٹابایا راج پکسے کی عبوری حکومت کی پیشکش ٹھکرا دی ہے ۔
سری لنکا اس وقت اپنی تاریخ کے سب سے بڑے معاشی بحران کے درمیان فسادات اور تشدد سے دوچار ہے۔ ایسی صورتحال میں میڈیا رپورٹس کے مطابق سری لنکا کے سابق وزیر اعظم مہندا راج پکسے اور ان کے اہل خانہ نے بحری اڈے پر پناہ لے رکھی ہے۔ اس خبر کے منظر عام پر آنے کے بعد حکومت مخالف مظاہرین نے سری لنکا کے شمال مشرق میں واقع اس ترنکومالی نیول بیس کے باہر احتجاج شروع کر دیا۔
ذرائع کے حوالے سے خبر شائع ہوئی ہے کہ سابق وزیراعظم اور ان کے اہل خانہ کو ہیلی کاپٹر میں نیول بیس لے جایا گیا ہے۔ یہ نیول بیس دارالحکومت کولمبو سے تقریباً 270 کلومیٹر دور ہے۔
سری لنکا میں پیر 9 مئی کو اس وقت کے وزیر اعظم مہندا راج پکسے کے حامیوں کی جانب سے پرامن حکومت مخالف مظاہرین پر حملے کے بعد تشدد پھوٹ پڑا ۔ اس تشدد میں ایک رکن پارلیمنٹ سمیت کم از کم 5 افراد ہلاک ہوئے جب کہ سینکڑوں زخمی ہوئے ۔ تشدد کے بعد پیر 9 مئی کو سری لنکا میں ملک گیر کرفیو نافذ کر دیا گیا تھا اور ہزاروں فوجی، پولیس کو تعینات کیا گیا تھا۔ دوسری جانب مہندا راج پکسے نے وزیراعظم کے عہدے سے استعفیٰ دے دیا۔
وزیر اعظم کی رہائش گاہ پر حملہ، راج پکسے خاندان کےآبائی گھر میں آتشزدگی ، میڈیا رپورٹس کے مطابق ہزاروں حکومت مخالف مظاہرین نے پیر کو دیر گئے کولمبو میں وزیر اعظم کی سرکاری رہائش گاہ میں داخل ہونے کی کوشش کی جس کے بعد پولیس کو آنسو گیس کے شیل کا استعمال کرنا پڑا اور ہجوم کو منتشر کرنے کے لیے ہوا میں فائرنگ کی۔ خبر رساں ادارے اے ایف پی نے ایک اعلیٰ سکیورٹی اہلکار کے حوالے سے بتایا کہ وزیراعظم کی رہائش گاہ پر کم از کم 10 پٹرول بم پھینکے گئے ۔
ایسے میں فوج مہندا راج پکسے اور ان کے خاندان کو بچانے کے لیے منگل 10 مئی کی صبح ہیلی کاپٹر میں بحریہ کے اڈے پر پہنچی۔
اس سے قبل پیر کے روز ہمبنٹوٹا میں راج پکسے کے آبائی گھر سمیت متعدد سیاست دانوں کے گھروں پر تشدد پھوٹ پڑا۔
منظر عام پر آنے والی ویڈیو فوٹیج میں مہندا راج پکسے اور ان کے چھوٹے بھائی اور صدر گوٹابایا راج پکسے کا پورا گھر جلتا ہوا دکھایا گیا ہے۔
اپوزیشن نے صدر گوٹا بایا کی عبوری حکومت کی پیشکش کو مسترد کر دیا۔
سری لنکا میں مہینوں سے جاری معاشی بحران کے دوران اقتدار پر راج پکسے خاندان کی گرفت کمزور پڑ گئی ہے۔ سری لنکا 1948 میں آزادی کے بعد سے بدترین معاشی بحران سے گزر رہا ہے۔ جب کہ وزیر اعظم بھائی مہندا راجہ پکسے نے اپنا استعفیٰ پیش کر دیا ہے، صدر گوٹابایا راج پکسے سیکورٹی فورسز پر وسیع اختیارات اور کمان کے ساتھ عہدے پر برقرار ہیں۔
سری لنکا کی مرکزی اپوزیشن پارٹی SJB نے آج صدر کی اپنی قیادت میں عبوری حکومت بنانے کی تجویز کو مسترد کر دیا۔ اس کے بجائے، SJB نے صدر کے استعفیٰ کا مطالبہ کیا ہے۔
سری لنکا کی معاشی حالت ابتر، لوگوں میں غصہ بڑھتا جا رہا ہے۔
سری لنکا 1948 کے مالیاتی بحران کے بعد پہلی بار اس پیمانے کے معاشی بحران سے گزر رہا ہے۔ چاول، دودھ، تیل جیسی اشیائے ضروریہ کی قیمتیں بھی عروج پر ہیں۔ جس سے ملک بھر میں بڑے پیمانے پر احتجاج اور سیاسی عدم استحکام پیدا ہوا ہے۔
سری لنکا کے پاس اس وقت صرف 50 ملین ڈالر کے قابل استعمال غیر ملکی ذخائر ہیں۔ سری لنکا کے وزیر خزانہ علی صابری نے خود یہ بات گزشتہ ہفتے کہی تھی اور اس کی وجہ کورونا کی وبا، تیل کی بڑھتی ہوئی قیمتوں اور ٹیکسوں میں کمی کو قرار دیا تھا۔
وزیراعظم مہندا راج پکسے کا استعفیٰ، معاشی بحران ، ہنگامے ، اب سری لنکا میں آگے کیا ہوگا؟ اس پر دنیا بھر کی نظر لگی ہوئی ہے ۔
