ناسک پولیس کی مجرموں کے ساتھ پارٹی ، یونٹ ون کی ٹیم نے رنگے ہاتھوں پکڑا , ملزم کے ساتھ تعلق اور پارٹی کرنا سنگین قانون کے خلاف ورزی

ناسک : پونے کے بدنام زمانہ گینگسٹر گجیا مارنے کو پونے سے سانگلی جیل لے جانے کے دوران پولیس نے ایک ڈھابے پر مٹن پارٹی کرنے کا واقعہ تازہ ہے، وہیں ناسک شہر میں بھی ایسا ہی واقعہ پیش آیا ہے۔ سٹی پولیس ہیڈکوارٹر میں ڈیوٹی پر مامور چار پولیس اہلکاروں کے نواحی علاقے کے قریب ایک ہوٹل میں دو ملزمان کے ساتھ پارٹی کرنے کے افسوسناک واقعہ نے پولیس فورس میں ہلچل مچا دی ہے۔ موصولہ اطلاع کے مطابق ناسک روڈ سنٹرل جیل میں دو مختلف جرائم میں سزا کاٹ رہے دو ملزمان کو جیل پارٹی پولیس نے عدالتی کارروائی کے لیے جیل سے تحویل میں لے کر ڈسٹرکٹ اینڈ سیشن کورٹ لے گئے ، کام مکمل کرنے کے بعد پولیس اہلکاروں نے ملزمان کو بیڑیوں میں جکڑ کر پولیس کی گاڑی میں ناسک روڈ جیل کی طرف سفر شروع کیا۔ اس دوران پولیس نے گاڑی کو اپنگر پولیس اسٹیشن کی حدود میں روکا اور ہوٹل پہنچ کر قیدیوں کے ساتھ پارٹی شروع کی۔ یہ واقعہ پونے روڈ پر واقع ایک مشہور ہوٹل میں پیش آیا۔ اس وقت ایک شہری نے دیکھا کہ وردی پوش پولیس اہلکار ایک ہوٹل میں ہتھکڑی والے ملزم کے ساتھ رات کا کھانا کھا رہے ہیں اور شہری نے معاملہ براہ راست پولس کمشنر سندیپ کارنک کی توجہ میں لایا۔

اس کے بعد پولس کمشنر نے ایک خصوصی ٹیم جائے وقوعہ پر بھیجی۔ یونٹ ون کی ٹیم نے ہوٹل پر چھاپہ مار کر چار پولیس اہلکاروں کو ملزمان کے ساتھ کھانا کھاتے ہوئے رنگے ہاتھوں پکڑ لیا۔ سینئر افسران رات گئے تک ان تمام پولیس اہلکاروں سے پوچھ گچھ کر رہے تھے۔ ملزم کے ساتھ تعلق اور پارٹی کرنا سنگین خلاف ورزی سمجھا جاتا ہے۔ ابتدائی تفتیش میں قصوروار پائے جانے والے پولیس افسران کی معطلی کا امکان ہے۔ پولیس جو کہ ریاست میں قانون کی محافظ ہے اور عام لوگوں کو انصاف دلاتی ہے، اگر مجرموں کے ساتھ پارٹی بن رہی ہے تو سوال یہ پیدا ہوتا ہے کہ عام شہری انصاف کے لیے کس کی طرف دیکھیں ؟