چاندوڑ میں 139 گرام ایم ڈی پاؤڈر کے ساتھ 3 نوجوان گرفتار ، نشہ آور اشیاء ، کار اور دیگر سامان سمیت تقریباً 10 لاکھ 78 ہزار روپے کا مال ضبط

چاندوڑ / چاندوڑ پولیس نے منشیات کے خلاف بڑی کارروائی کرتے ہوئے ممبئی سے مالیگاؤں آنے والی ایک کار سے 139 گرام ایم ڈی (میفیڈرون) پاؤڈر برآمد کر لیا اور مالیگاؤں کے تین نوجوانوں کو گرفتار کر لیا۔ پولیس نے نشہ آور مادہ، کار اور دیگر سامان سمیت تقریباً 10 لاکھ 78 ہزار روپے مالیت کا سامان ضبط کیا ہے۔

پولیس کے مطابق یکم اگست، بروز سنیچر کو خفیہ اطلاع کی بنیاد پر چاندوڑ ٹول پلازہ پر ممبئی سے مالیگاؤں کی جانب آنے والی کیا کار (MH 41 BL 2720) کو روک کر تلاشی لی گئی۔ تلاشی کے دوران گاڑی سے 139 گرام ایم ڈی پاؤڈر برآمد ہوا، جس کی مالیت تقریباً 2 لاکھ 78 ہزار روپے بتائی گئی ہے۔

اس کارروائی کی قیادت چاندوڑ پولیس اسٹیشن کے انسپکٹر واگھ اور مالیگاؤں کے ایڈیشنل سپرنٹنڈنٹ آف پولیس سورج گنجال کی خصوصی ٹیم نے کی۔ کارروائی میں پولیس کانسٹیبل راکیش اوبالے، راکیش جادھو، دینیش شراوٹے، اکشے چودھری اور رام میسال نے حصہ لیا۔

گرفتار ملزمان کی شناخت عبدالرحمن شیخ اکبر (23 سال، رونق آباد، مالیگاؤں)، شیخ ریان شیخ شفیع الدین (32 سال، سلامت آباد، مالیگاؤں) اور شیخ شیبان شیخ نثار (21 سال، عباس نگر، مالیگاؤں) کے طور پر ہوئی ہے۔

پولیس نے تینوں ملزمان کے خلاف این ڈی پی ایس (NDPS) ایکٹ کے تحت چاندوڑ پولیس اسٹیشن میں مقدمہ درج کر لیا ہے۔ یہ کارروائی ناسک دیہی سپرنٹنڈنٹ آف پولیس ڈاکٹر ڈی۔ ایس۔ سوامی اور ایڈیشنل سپرنٹنڈنٹ آف پولیس سورج گنجال کی ہدایات پر انجام دی گئی، جبکہ معاملے کی مزید تفتیش جاری ہے ۔