آصف شیخ رشید نے دہلی میں اسپورٹس وزارت میں منسٹر رکشا کھڑسے سے ملاقات کرتے ہوئے بتایا کہ جب میں مالیگاؤں شہر کا ایم ایل اے تھا تب آپکے والد ایکناتھ کھڑسے نے اردو گھر کی منظوری اور تعمیر کیلئے کروڑوں کا فنڈ فراہم کیا تھا جس کے چلتے ایک شاندار عمارت اردو گھر کے نام سے بنائی گئی ہے جہاں عوام اور اہل اردو استفادہ کررہے ہیں ۔موصوف نے کہا کہ ایکناتھ کھڑسے اقلیتی برادری کے ساتھ کھڑے نظر آتے ہیں اس لئے ہمیں امید ہے کہ آپ بھی مالیگاؤں شہر کے نوجوانوں کے بہتر مستقبل کیلئے اسپورٹس کیلئے فنڈز فراہم کرینگے ۔آصف شیخ کے مطالبات پر رکشا کھڑسے نے اطمینان بخش تیقن دیتے ہوئے کہا کہ میں مہاراشٹر کی نمائندگی کیلئے آئی ہوں اور ابھی چند روز قبل ہی میں نے وزارت سنبھالی ہے ۔آئندہ چند دنوں میں تمام حالات کا جائزہ لیتے ہوئے مجھ سے جو ممکن ہوگا میں مالیگاؤں کو فنڈز دینے کی کوشش کرونگی ۔اس موقع پر آصف شیخ نے وزیر رکشا کھڑسے کو وزارت ملنے پر نیک خواہشات و مبارک باد بھی پیش کی ۔اس موقع پر منموہن شیواڑے اور عبد المطلب شیخ بھی موجود تھے ۔
