متاثرہ لڑکی بھیونڈی کے ایک اسکول میں دسویں جماعت میں پڑھتی ہے اور شانتی نگر علاقے میں اپنے خاندان کے ساتھ رہتی ہے۔ معلوم ہوکہ کچھ دور جانے کے بعد ایک نامعلوم مسافر لڑکی کے رکشے میں سوار ہوا جو اپنے گھر سے اسکول جانے کے لیے نکلی تھی۔ اسکول پہنچنے کے بعد بھی رکشہ نہ رکا تو اس نے ڈرائیور سے رکنے کی درخواست کی۔ تاہم ڈرائیور اور نامعلوم مسافر نے اسے خاموش رہنے کی دھمکی دی اور رکشہ کو چویندرا کی طرف چلانا شروع کردیا۔ طالبہ نے چالاکی اور ہمّت دکھاتے ہوئے اپنے بیگ میں رکھا اسپرے استعمال کیا۔ اس نے رکشہ ڈرائیور پر براہ راست اسپرے کیا اور مسافر کو دھکا دے کر رکشہ سے باہر چھلانگ لگا دی۔ اس کے بعد وہ سیدھی اسکول بھاگی اور بعد میں گھر واپس آکر اپنے والدین کو سارا واقعہ سنایا۔ والدین نے فوری طور پر شانتی نگر پولیس اسٹیشن میں شکایت درج کروائی۔
متعلقہ معاملے میں 11 جولائی کو ایک کیس درج کیا گیا تھا، اور پولیس نے تعزیرات ہند 2023 کی دفعہ 137 (2) (اغوا کرنے کی کوشش) اور دفعہ 62 (اجتماعی شرکت) کے تحت تفتیش شروع کر دی ہے۔ پولیس ملزم رکشہ ڈرائیور اور اس کے ساتھی کی تلاش کر رہی ہے۔ اس واقعہ نے بھیونڈی کے علاقے میں زبردست ہلچل مچا دی ہے اور طلباء کے تحفظ کو لے کر والدین میں تشویش کا ماحول پیدا کر دیا ہے۔ اسکولی بچوں کے لیے پبلک ٹرانسپورٹ کو محفوظ بنانے کے لیے سسٹم کی جانب سے سخت اقدامات کیے جانے کا مطالبہ زور پکڑ رہا ہے۔
