ایس ٹی بس کا سفر ہوا مہنگا ، کرایہ میں اضافہ کی تجویز منظور ، نئے نرخ آج آدھی رات سے ہونگے لاگو

ممبئی : اسٹیٹ ٹرانسپورٹ اتھارٹی نے مہاراشٹر اسٹیٹ روڈ ٹرانسپورٹ کارپوریشن (ایس ٹی) کے مسافر کرایہ میں 13.56 فیصد اضافہ کرنے کی تجویز کو منظوری دے دی ہے، اور یہ اضافہ آج آدھی رات سے لاگو ہوگا۔ دریں اثنا، عام بس خدمات پر پہلے لاگو کیا گیا 10 فیصد عارضی کرایہ میں اضافہ منسوخ کر دیا گیا ہے۔

خلیجی ممالک میں جنگ جیسی صورتحال کی وجہ سے ڈیزل کی قیمت میں اضافہ، ایس ٹی ملازمین کے مختلف الاؤنسز میں اضافہ اور گاڑیوں کے اسپیئر پارٹس، ٹائر اور دیکھ بھال کے اخراجات میں نمایاں اضافہ نے کارپوریشن کے مالی بوجھ کو بڑھا دیا ہے۔ ان تمام عوامل کو مدنظر رکھتے ہوئے اسٹیٹ ٹرانسپورٹ اتھارٹی نے کرایوں میں اضافے کو منظوری دی۔

وزیر ٹرانسپورٹ اور مہاراشٹر اسٹیٹ روڈ ٹرانسپورٹ کارپوریشن کے چیئرمین پرتاپ سارنائک نے کہا کہ کرایہ میں اضافے کا تعین کرتے وقت اس بات کا خاص خیال رکھا گیا ہے کہ مسافروں پر مالی بوجھ کم سے کم ہو۔ یہ فیصلہ ریاست کے عام شہریوں کو محفوظ، قابل بھروسہ اور معیاری مسافر خدمات کی بلاتعطل دستیابی کو یقینی بنانے اور ایس ٹی کارپوریشن کو مالی طور پر قابل عمل بنانے کے مقصد سے لیا گیا ہے۔

ایس ٹی کو دیہی اور شہری علاقوں کو جوڑنے والی ریاست کی لائف لائن سمجھا جاتا ہے۔ اس لیے اگرچہ کرایہ میں اضافہ سے لاکھوں مسافر متاثر ہوں گے لیکن انتظامیہ کا کہنا ہے کہ کرایہ میں یہ اضافہ کارپوریشن کی مالی حالت کو بہتر بنانے کے لیے ضروری ہے۔

پرتاپ سرنائک نے مسافروں سے بھی اپیل کی ہے کہ وہ ہمیشہ کی طرح ایس ٹی سروس کے ساتھ تعاون کریں اور اپنے اعتماد کو برقرار رکھیں۔