مرکزی وزیر مملکت بھارتی پوار کی ماں کے گلے سے سونے کی چین چھین کر موٹر سائیکل سوار فرار ، مقدمہ درج

 

ناسک/ ضلع ناسک کے ساتھ ساتھ شہر میں گزشتہ کچھ دنوں سے قتل، ڈکیتی اور چوری جیسے واقعات میں اضافہ ہو رہا ہے۔  جس کی وجہ سے شہریوں میں خوف کی فضا پھیل گئی ہے۔  اس طرح ناسک شہر کے آر ٹی او روڈ علاقے میں ایک واقعہ پیش آیا ہے جہاں موٹر سائیکل پر سوار چوروں نے مرکزی وزیر مملکت بھارتی پوار کی ماں کے گلے سے سونے کی چین چھین لی۔  اس واقعہ سے شہر سمیت ضلع بھر میں کھلبلی مچ گئی ہے ۔

 اس معاملے میں مزید معلومات یہ ہے کہ مرکزی ریاستی وزیر بھارتی پوار کی ماں شانتا بائی باگل آر ٹی او علاقے میں رہتی ہیں اور کل شام وہ سبزی لانے کے لیے درگا نگر علاقے میں گئی تھیں۔  اس وقت موٹر سائیکل پر آنے والے دو افراد نے ان کے گلے میں ہاتھ ڈالا اور دو سے ڈھائی تولے سونے کی چین چھین کر فرار ہوگئے ۔

سونے کی زنجیر نوچنے کا احساس ہونے کے بعد شانتا بائی باگل نے چیخ ماری لیکن آس پاس کوئی نہ ہونے کی وجہ سے ملزمان فرار ہونے میں کامیاب ہوگئے ۔

 دریں اثنا، اس واقعہ کے بعد شانتا بائی باگل نے فوری طور پر مہسرول پولیس اسٹیشن پہنچ کر شکایت درج کرائی۔  ملزمان کے موقع سے فرار ہونے پر پولیس نے سی سی ٹی وی کیمرہ کی بنیاد پر تلاش شروع کر دی ہے اور ملزم کی شناخت ہونا باقی ہے۔